بلوچستان هاي کورټ د افغان کډوالو د جبري ستنولو پر ضد عريضه ومنله
کويټه – ۲۳ سپتمبر ۲۰۲۵: د بلوچستان عالي محکمې د دوشنبې په ورځ د افغان کډوالو د ستنولو پر ضد اساسي عريضه د اورېدنې لپاره ومنله او د فدرالي او صوبايي چارواکو څخه يې رسمي ځواب وغوښت.
د دوو قاضيانو جرګه، د ستر قاضي روزي خان بړاچ او قاضي سردار احمد حليمي په مشرۍ، دغه دعوه واورېده چې د وکيل سيد نذير اغا له لوري وړاندې شوې وه. نوموړي له محکمې غوښتنه وکړه چې د کډوالو د ستنولو کمپاين لږ تر لږه شپږ مياشتې وځنډوي، ځکه زرګونه افغان کورنۍ له سختو ستونزو سره مخ دي.
اېډوکېټ اغا محکمې ته وويل چې په بلوچستان کې په زرګونه افغان زدهکوونکي ښوونځيو او کالجونو کې زدهکړې کوي او د کلنۍ ازموينې ته نږدې دي. د دوی جبري ستنول به د زدهکړې لړۍ سخته زيانمنه کړي. نوموړي دا هم زياته کړه چې ډېر افغانان په بلوچستان کې د لسیزو راهيسې مېشت دي، ملکيتونه او کاروبارونه لري، او اوسني اقدامات د هغوی د ژوند او مال پر وړاندې ستر ګواښ دی.
محکمې د لومړنيو اورېدنو وروسته عريضه د اورېدنې وړ وبلله او اړوندو چارواکو ته يې د ځواب ليکلو نوټسونه صادر کړل. په دې کې د فدرالي کورنيو چارو سکرتر، د سرحدي چارو وزارت، د بلوچستان چيف سېکرتر او امنيتي ادارې شاملې دي.
ياده عريضه د ۲۰۲۳ کال له وروستيو راهيسې د پاکستان د کډوالو د ستنولو د کمپاين پر مهال وړاندې شوې ده، چې تر اوسه په لسګونو زره افغانان – د اسنادو لرونکي او بېاسناده – د سرحد هغې غاړې ته ستانه شوي دي. حکومت دغه پاليسي د امنيتي اندېښنو پر اساس توجيه کوي، خو د بشري حقونو ډلې يې پر وړاندې سختې نيوکې کوي او وايي چې دا پرېکړه په ځانګړي ډول ښځې او ماشومان تر ټولو زيات ځپي.
محکمه به دا قضيه له هغه وروسته بيا واخلي کله چې حکومت خپل ليکلي ځواب وړاندې کړي.
Comments
Post a Comment